ذكريات اول عمرة .

كان المفروض اكتب هالموضوع قبل 7 اشهر او اكثر بس ما حصلت فرصه اكتبه لانه كان تقريبا عندي ملل من كل شي وبعدها بفتره قطعت التدوين وما اكن لي نيه فعلا اني اكمل . فيه اشياء حلوه وفيه اشياء مره  ومرات المكس . طبعا لاني سوبر لكي وعلى نحاستي اول ما سرنا نحط الشنط  نسيت اخذ لباس الاحرام ووقتها الشنطه في المشمش , زيت انه ولد خال الوالده اللي كان تقريبا ماسك زمام الامور بكل شي ما شالله عليه تبرع بالنص وسوالي علامة البزنس من بعيد وقتها انا >.> , طبعا النص الثاني كان وزاري , على العموم النحاسه ما خلصت , وانا بالمطار ساير اغير هدومي الكل ينادي باسمي وانه الطياره راح تطير وما تهنيت للاسف وما رتبت نفسي وهوبا للطياره .نزلنا للمطار ورحنا للسكن بسرعه وكان وقتها تقريبا 2 بالليل , قلنا خلنا نستغل الفرصه ونبداها من الحين , اول شي تقريبا حسيته لما شفت الكعبه بشي صعب ينوصف , كنت دايما اشوفها بالتلفزيون وما حسيت بهالشي الا يوم شفته بعيوني , التجربه شي ثاني بالمره , جسينا انه بدت الزحمه تزيد ولما دخلنا نسعي كانت زحمه خانقه يقودها البيرق الايراني اللي كانوا تقريبا الاكثريه بالسعي وكانت زحمه مب طبيعيه غير التعديلات وقتها اللي كانت مضيقه المكان , طبعا خلصنا طواف والحمدالله ومن زود التعب ريلي شبه ميته وما صرت احس فيها وتعايزت اني اسير اتحلق , لقيت واحد رهيب قص لي الشعر ووقتها كنت متندم انه هو اللي حلق لاني حسيت انها حلاقة هوش ( غنم ) بس من زود التعب كنت اقول في نفسي نعيما وخلصنا . طبعا تقابل وقتها صلاة الصبح وكانت زحمه زحمه زحمه بدرجه مب طبيعه ما لقينا مكان نصلي ولا لقينا مكان حتى نروح , اخرتها لقيت مكان وبالدس بس مشت على خير وللاسف ضيعت اهلي وقتها ومن قبل قلتلهم انهم يسيرون الفندق على طول , طبعا نعالي كانت بكيس وما شفته وقتها ورديت حافي ( بدون جزمه ) الفندق وحسيت بالام ظهر وبطن وارض وجو بس عدت على خير .

- فيه ناس من كثر ما يطلعونك تصير تحفظهم وحتى ممكن تصدمهم وبالاخير يقولك اول مره اشوفك , مو مشكله يا كثر اللي يطلعون لك اللي يقولولك عمره عن بدل باكثر من صوره , بالمجمعات , بالمطاعم والمصيبه انهم يتفننون معاك كيف بيعرضونها عليك , اذكر كنت بالطابق الثالث اصور فيديو ولا واحد طلعلي فروم نو وير وبكل لباقه مع انها المره الاربعطش بعد الميه بطلعلي ” تبي حجه عن بدل ؟ ” والمصيبه تشوفهم بكروتهم وتحس كل واحد صاير موديل مو عن بدل .

-الطلابات مع اني كنت اسمع بوحشيتهم هناك انه ممكن لدرجه يشلونك مع الفلوس , اكثر شي سلبي صراحه شفته هناك مع انه الظاهره قلت كثير , المصيبه مليون وحده تطلعلك فروم نو وير , المهم مشيناها اول يومين بس الظاهر ما عجبهم الوضع وتقعد تسمع معلقات الشعر العربي كله بالطريق بس للاسف ما ينفع . فيه مره اذكر عطيت وحده 5 ريال والثانيه عطيتها 3 ريال قعدوا يتضاربوا ولما وصلت عندهم انه ما فيه خرده ( فكه ) قالت وحده هات انا اعطيك الفكه بالريال , قلتلها ما ابي الا الفكه منك . للاسف اكثر شي انزعجت منه هناك لدرجه كبيره , غير الدراما والمسلسلات الهنديه اللي ضاع زوجها واللي مات ولدها واللي واللي  اح .

- فيه مره من المرات سرت لبيتزا هت القريب من الحرم , ولا اشوف ربيعي موجود مع انه تقريبا كان شبه مسافر وقتها وما كنت ادري انه بسير السعوديه , المهم في ذاك اليوم يلسنا اليوم كله نسولف , ونحن راجعين تعبانين ومادري اساسا كيف استوت الا واشوف السيكيوريتي يقول فين يا حبيبي رايحين , الا بعد ما استوعبنا , طلعنا من هناك ونشوف اللافته مكتوب دورات مياه – حريم , وقتها حمر ويهي وربيعي علق العداد عنده من الضحك وقعد يضحك من الخاطر , وقال اخرتها جذيه معاك , ما تستحي على ويهك ياي تعتمر واخرتها نشوفك تروح لل , لالا مش طبيعي انت . وقتها كنت سكران من كل شي كانت الساعه مدري كم واصلا ما كان شي يبين بالطريق انه درج لتحت , المهم عدت على خير ودومي من نشبه لنشبه ثانيه .

- من المرات كنت مستعيل على صلاة الظهر والمصعد وقتها طالع نازل ومزحوم ودايما تشوف الكل يطالعك بنقمه او حتى يبتسملك كنوع من التذمر . المهم علق الوضع معاي مره , الا وواحد يدخل مع ولده وما انتبهت له ذاك الوقت مادري ليش ( يمكن من النظرات الخطيره اللي اشوفها كل شوي من المصعد ) الا واسمع صوت  مش غريب علي , ما استوعبت صراحه الا يوم طلع وقلت في خاطري هذا اكيد العريفي . بعدها بيوم يقولي ولد خالي انه يلس عنده اكثر من ساعه يسولف عنده وام النذاله بس فيني حتى يقولي . اذكر مره بالمصعد كانت  هناك مجموعة حريم بشكل مكثف ويمكن انا وواحد يالسين على الزاويه وكانت ضكه ( زحمه ) والمسكين هذاك على اول خطوه يحط فيها ريله , قالتله وحده صغيره فكككككككككككككككككككككككككككككككككككككككككككككككككككككككككه , والله شكله اول ما سمعها للحين في بالي ودومي اضحك عليها .